నిరాహార దీక్షలు -- నేతి పెసరట్లు

మేము 1972 ప్రాంతంలో అనుకుంటా కాకినాడ దగ్గరలోని తిమ్మాపురంలో ఉండేవాళ్ళం. ఆ సమయంలో నేను ఒకటవ తరగతి చదువుతున్నాను. అపుడు జై ఆంధ్ర ఉద్యమం అని గుర్తు. నిరాహార దీక్షలు చేసారు. ఊరి మొదట్లో ఇప్పటిలా అన్ని ఇళ్ళు లేవు. ఇప్పటి పోలీస్ స్టేషను లేదు . అక్కడ స్కూల్, పక్కన ఒక పెద్ద  నంది విగ్రహం ఉండేది. అక్కడ శిబిరం వేసారు. తిమ్మాపురం సైకిళ్ళకు ప్రసిద్ది తెలుసు కదా? అక్కడ కాకినాడ కంటే తక్కువ ఖరీదుకు సైకిలు బిగించి ఇస్తారు. అది ఒక్కటే కాదు , నేతి పెసరట్లకు కూడా ప్రసిద్ది అప్పట్లో మరి. సరే నేను చూసిన విషయం చెపుతున్నా అంతే. ఉదయాన్నే నిరహార దీక్షా పరులు ( కొందరు మాత్రమే నండోయ్) శిబిరం వద్దకు వచ్చి వెనక చేరి రెండు, మూడు నేతి పెసరట్లు తిని అప్పుడు నిరసనదీక్షలో కూర్చొనే వారు.     ( పాపం శమించు గాక )  మేము చూసి ఇదేదో బాగుంది అని మేమూ కూర్చుంటాము అనే వాళ్ళం. అందరూ అలాటి వాళ్ళని కాదు, కొందరు మాత్రం పాపం అలా వాళ్ళ సహకారాన్ని అందించే వారు. ఈ మధ్యన జరుగుతున్న నిరాహార దీక్షలు చూసి నాకు ఈ విషయం గుర్తు వచ్చింది. 

 

              అక్కడ ఉండగానే ’ పాపం పసివాడు ’ సినిమా రిలీజ్ అయింది. హెలికాఫ్టర్ లో పాంప్లెట్స్ విసిరారు. అప్పట్లో అది చాలా వింతైన పబ్లిసిటి మరి అంతే కాదు హెలికాఫ్టర్ చూడటం కూడా కొత్తే మాకు.